Job 11

Sofari Anasema: Hatia Ya Ayubu Inastahili Adhabu

1 ^aNdipo Sofari Mnaamathi akajibu:
2 ^b“Je, maneno haya yote yapite bila kujibiwa?
Je, huyu mnenaji athibitishwe kuwa na haki?

3 ^cJe, maneno yako ya upuzi yawafanye watu wanyamaze kimya?
Je, mtu asikukemee unapofanya dhihaka?

4 ^dUnamwambia Mungu, ‘Imani yangu ni kamili
nami ni safi mbele zako.’

5 Aha! Laiti kwamba Mungu angesema,
kwamba angefungua midomo yake dhidi yako,

6 ^enaye akufunulie siri za hekima,
kwa kuwa hekima ya kweli ina pande mbili.
Ujue hili: Mungu amesahau hata baadhi ya dhambi zako.

7 ^f“Je, waweza kujua siri za Mungu?
Je, waweza kuyachunguza mambo yote kumhusu Mwenyezi?

8 ^gNi juu mno kuliko mbingu: waweza kufanya nini?
Kina chake ni kirefu kuliko kuzimu:
wewe waweza kujua nini?

9 ^hKipimo chake ni kirefu kuliko dunia,
nacho ni kipana kuliko bahari.

10 ⁱ“Kama akija na kukufunga gerezani,
na kuitisha mahakama, ni nani awezaye kumpinga?

11 ^jHakika anawatambua watu wadanganyifu;
naye aonapo uovu, je, haangalii?

12 ^kMpumbavu aweza kuwa mwenye hekima,
endapo mtoto wa punda-mwitu atazaliwa mwanadamu.

13 ^l“Hata sasa ukiutoa moyo wako kwake
na kumwinulia mikono yako,

14 ^mukiiondolea mbali ile dhambi iliyo mkononi mwako
wala usiuruhusu uovu ukae hemani mwako,

15 ⁿndipo utainua uso wako bila aibu;
utasimama imara bila hofu.

16 ^oHakika utaisahau taabu yako,
utaikumbuka tu kama maji yaliyokwisha kupita.

17 ^pMaisha yako yatang’aa kuliko adhuhuri,
nalo giza litakuwa kama alfajiri.

18 ^qUtakuwa salama, kwa kuwa lipo tumaini;
utatazama pande zote na kupumzika kwa salama.

19 ^rUtalala, wala hakuna atakayekuogofya,
naam, wengi watajipendekeza kwako.

20 ^sBali macho ya waovu hayataona,
wokovu utawaepuka;
tarajio lao litakuwa ni hangaiko
la mtu anayekata roho.”